【宅語學】宅界嘅股票術語


《情色漫畫老師》嘅劇情又爛又悶,如果唔係角色夠討好,早就棄番。睇到第9集,配角之一嘅山田妖精,忽然嚟個大逆襲,大出風頭之下人氣急升,就連字幕組都玩嘢,用「優質股」嚟形容山田。嗱,唔好諗錯隔離,呢個「股」其實係指股票,但到底點解ACG角色會同股票扯上關係?

首先我地嚟了解一下,山田嘅哥哥講呢句說話有乜意思。原句係「妹は優良物件だと思うのだ。そうは思わないか?」,相信唔識日文都睇得明「優良物件」呢四個漢字。日本人會用呢個TERMS嚟形容質素好嘅建築物,由此延伸出另一意思,就係值得交往、結婚嘅對像,用法同廣東話嘅「筍盤」一模一樣。至於字幕組所用嘅「優質股」,原理一樣,都係用財經術語去做比喻。

不過現實中,宅人喺網上交流果陣,亦都好興用各種股票術語嚟加強語氣,字幕組其實係想NETA呢一點。如果宅人想表達自己好鍾意某個女角色,除咗話佢好萌,亦都會話「買咗XX股」,XX會係角色名或者代號,通常都係兩個字。第9集出街之後,好多宅人話要買「山田股」,就係愛上咗佢咁解。

當角色人氣急升,突然多咗好多人追捧,就會話佢「股價大漲」甚至「漲停板」,相反支持者離棄果個角色,股價自然大跌。

「股價」呢種講法由邊度傳嚟,已好難考證,萌娘百科話係源於《果青》第九卷嘅輕之國度翻譯,但印象中更早已經好流行咁講。唔知大家仲記唔記得2011年播放嘅《魔法少女小圓》,主角之一嘅巴麻美甚為搶鏡,巨乳人妻屬性加上實力超班,所以引嚟好多宅人大手買入「學姊股」,點知去到第三集,慘.被.斷.頭!當時學姊股唔單止即刻跌停板,仲變埋廢紙,因為當角色死亡,宅人之前所投入嘅愛同支援,全部都白費晒。就算學姊之後重新復活(復牌),大家都擔心巴麻美唔知幾時又再慘死,無人再夠膽投資落去。

(順帶一提,如果而家Search「學姊股」,除咗巴麻美之外,亦會見到《不起眼》裡面嘅霞之丘詩羽,而且仲有唔少人話要「全押學姊股」呢)

用股票術語來描術宅人對角色嘅愛,可以更準確描述當中出現嘅大起大跌。由於而家嘅作品多數得13集或更少,劇情去得急,角色會喺毫無預警下突然討好或黑化,人氣起落無常,正好同而家股票市場嘅氣氛相近。但另一方面,呢種對於角色嘅「投資」,反映咗宅人對於角色抱疏離同唔信任態度。因為股票特色之一正正係「短炒」,今日高追,聽日放晒都無所謂,比起叫角色做老婆,愛嘅程度明顯不足,而且拋棄角色時,罪惡感亦無咁大。

唔知大家喺呢個ACG股票市場度,有無咩投資經歷可以分享下呢?

萌娘百科「oo股」條目

Komica wiki「股價」條目

更多精彩回應,盡在好宅之人

追加︰

有時真的擔心,蘋果日報的中年讀者,是否看得懂記者在寫甚麼呢?(當然宅人另計)